ཚེ་ནི་མི་རྟག་པ་རླུང་གི་ནང་མར་མེ་འདྲ། | impermanent life like better lamp in the wind |
ཚེ་འདི་མི་རྟག་རླུང་ནང་མར་མེ་འདྲ།།
སྐར་ཆ་བཞིན་དུ་འཆི་ལ་ཉེ་བར་འགྲོ།
ད་ལྟ་བདེ་ཀྱང་ཡུད་ལ་མེད་པར་འགྱུར།།
དགའ་སྐྱིད་འཛོམས་ཡང་ནམ་ཞིག་ཟད་དུས་ཡོང་།།
ད་ལྟ་ཡིད་མཐུན་ཡི་ཆེས་ཞག་འདས་འཁོན།།
དེ་རིང་ཡོད་ཀྱང་སང་ཉིན་ཞག་རྗེས་བརླག
ཇི་ཙམ་ཕྱུག་ཀྱང་ནམ་ཞིག་འཁྱེར་དབང་མེད།།
རང་དབང་འབད་ཀྱང་གཞན་དབང་ལས་ཀྱིས་ཤོར།
བསམ་པ་བཞིན་དུ་ཐོབ་འོང་སུ་ལའང་མེད།།
མི་རྟག་ཆོས་ཅན་རྟེན་འབྲེལ་བསླུ་མེད་འདི།།
བཟང་སྡུག་གང་བྱེད་དེ་ལ་རྣམ་སྨིན་ཡོད།།
རྟེན་འབྲེལ་རྒྱལ་པོར་སུ་ཡིས་བསླུ་མི་ཐུབ།།
ཡིད་བརྟན་མི་བྱེད་ཕྱི་མའི་བདེ་ལ་བརྩོན།།
ཆུ་རྭ་ལེགས་པོ་རང་གི་སེམས་ལ་རྒྱགས།།
རང་སྐྱིད་ཚེ་ན་གཞན་ལ་སྙིང་ཚིམ་དང་།།
ཐུབ་ཚོད་གཞན་སེམས་དཀྲུག་པའི་ལས་འདི་སྤོང་།།
ནམ་ཞིག་རྒྱུ་རྐྱེན་གྲངས་ནི་ཚང་བ་ན།།
མི་དྲན་དགུ་དྲན་འཛམ་གླིང་དགྲ་རུ་ལང་།།
རྐྱེན་ངན་བར་ཆད་ཆར་པ་བཞིན་དུ་བབས།།
རྣམ་སྨིན་སྡུག་པོ་ལུས་གྲིབ་བཞིན་དུ་འོང་།།
གཞན་གནོད་འབྲས་བུ་མི་བདེ་འབའ་ཞིག་ཡོད།།
གཞན་ཕན་ཁོ་ན་རང་ལ་བདེ་བྱིན་པས།།
ད་ནས་ཕན་སེམས་མ་གཏོགས་གནོད་སེམས་སྤོང་།།
--------------------------------------------------
སེམས་ཅན་གཤིས་རྒྱུད་བཟང་ན་ཡང་།།
རྐྱེན་དང་ཉོན་མོངས་བསླུ་བར་བྱེད།།
རྟག་ཏུ་བདེ་ཐོབ་བརྩོན་ན་ཡང་།།
ཡོད་དགུའི་སྡུག་པོ་ཐོག་ཏུ་བབས།།
ལས་འབྲས་བསླུ་མེད་ཡིན་གོ་བྱུང་།།
སེམས་ཅན་ནད་མནར་སྡུག་ན་ཡང་།།
ཚོར་སྣང་སྙིང་རྗེ་སློབ་གསོ་མེད།།
གཞན་དོན་ལྷག་བསམ་ཚིག་ལ་བསྡུས།།
དམ་ཆོས་སྙིང་པོ་དེ་དང་འགལ།།
ལས་ངན་ཡོད་དགུ་བྱེད་པ་དང་།།
བྱ་བ་བཟང་དགུ་སྒྲུབ་པ་གཉིས།།
སྐབས་རེ་འབྲས་བུ་གོ་བཟློག་འདྲ།།
ལས་འབྲས་བསླུ་མེད་མིན་འགྲོ་བསམ།།
དེ་ཡང་སྔོན་ལས་བསླུ་མེད་ཡིན།།
སྤྱི་མིང་ཀུན་བསྡུས་གཅིག་ཏུ་དཔུང་།།
ཕལ་ཆེར་འདི་ལས་ཕྱི་མེད་འདྲ།།
རང་ལས་གཞན་བདེ་མི་དགོས་འདྲ།།
དེ་ཡང་བསླུ་མེད་བུ་ལོན་ཡིན།། །།
-------------------------------------------------------
གཞན་བཤད་རྗེས་འབྲང་རིག་པ་བླུན་པའི་རྟགས།
ཉམས་ཆུང་གཤེ་གཤེ་གཡོ་སྒྱུ་བརྙས་བཅོས་མང་།
གཞན་སེམས་དཀྲུགས་ཤིང་རང་ས་བདེ་སྐྱིད་བཀོད།
གནོད་ལན་མེད་ན་ལས་དང་རྒྱུ་འབྲས་ཅི།
དབྱུགས་པ་མ་ཆག་དུག་སྦྲུལ་བསད་དཔེ་དེ།
འཛུམ་དང་སྦྲང་རྩི་ཚིག་གིས་གཞན་སེམས་དཀྲུག
ནམ་ཞིག་ཚེར་མའི་དར་གཡོག་བསལ་བའི་ཚེ།
གསལ་ལེ་ཁ་འགྱུར་རང་ཐོག་སྨིན་པར་ཡོང་།
འཇིག་རྟེན་རྨོངས་ཤིང་རང་ཁེ་སྒྲུབ་དུས་འདིར།
བཟང་པོ་ཉམས་ཆུང་ཞེས་པ་མིང་ཙམ་ཡང་།
བརྙས་ཞིང་དམན་པར་ལྟ་ནས་སྤྱོད་པར་བྱེད།
སྔོན་བྱོན་མཁས་སྒྲུབ་དཀའ་སྤྱད་དངུལ་དང་བརྗེ།
གཞན་སེམས་མི་བདེ་གནོད་སེམས་བྱེད་པ་སོགས།
བྱང་ཆུབ་སེམས་ཀྱི་མཚན་ཉིད་དང་ཡང་འགལ།
གནབ་སེམས་ཡོད་པ་མི་དགེ་བཅུ་རུ་འདུ།
དཀོན་མཆོག་མིང་སྤྱོད་མཚམས་མེད་ལས་སུ་འདུ།
མི་ཚེའི་ལམ་དུ་སྐྱིད་སྡུག་གཉིས་ཀར་ཡོད།
སྐབས་རེ་སྐྱིད་ལ་སྐབས་རེ་འཚེར་སྣང་ཡོད།
རེ་སྐབས་འཇིགས་ལ་་རེ་སྐབས་སྤྲོ་སྣང་ཡོད།
དེ་སྐབས་རང་ཚུགས་མ་ཤོར་རང་དབང་ཡོད།
གཞན་ལ་ཕན་ཐོག་མ་ཐུབ་ཀྱང་།།
གནོད་པ་མི་བྱེད་སྨོན་འདུན་བྱ།།
ལས་འབྲས་བསླུ་མེད་སྨིན་དུས་ཡོད།།
བསམ་ཤེས་བྱེད་ན་བདེ་བར་ཡོང་།།
................,,,.................................................
ཚེ་ནི་མི་རྟག་པ་རླུང་གི་ནང་མར་མེ་འདྲ། | impermanent life like better lamp in the wind |
Hi. I’m Designer of Blog Magic. I’m CEO/Founder of ThemeXpose. I’m Creative Art Director, Web Designer, UI/UX Designer, Interaction Designer, Industrial Designer, Web Developer, Business Enthusiast, StartUp Enthusiast, Speaker, Writer and Photographer. Inspired to make things looks better.
0 comments:
Post a Comment